ايكينجي آناديلي قورولتايينا قاتيلانلارين بيانيهسي
ايكينجي آناديلي قورولتايينا قاتيلانلارين بيانيهسي
21 فوريه دونيا آناديلي عونوانيندا، چئشيدلي ندنلره گؤره آناديللري دگري و گرگي قدر حيمايت و موحافيظت اولونمايان بوتون اينسانلارا موبارك و اوميد وئريجي بير گوندور. ايران تاريخينده بئلنچي بير گونون عزيزلنمهسيندن 2 ايل كئچديگينه باخماياراق، 50 ميليون جيواريندا ان ايلكين كولتورل حاقلاريندان -يعني آناديلينده يازماق، اوخوماق، اويرتيم و ائييتيم- محروم اولان اينسانين وارليغي، سبب اولدوكي بو گون هيزلا همين اينسانلارين حافيظهسينه كئچيب، اونلاري گلهجگه -كي شوبههسيز گليب، چاتاجاق- اوميدوار ائتسين. ديل هر اينسانين كولتورل كيمليگينين ان اؤنملي فرقلنمه شاخيصهسي عونوانيندا، تاريخ بويو او ديلده دانيشانلارا چوخ اؤنملي اولوب و بير عيده روشنفكرنمانين يالنيش فيكيرلرينه -كي ديل يالنيز ايلگي آراجيدير- باخماياراق، اؤز ايچينده بير ميلت و قومون تاريخ، فولكلور، عنعنهلر و كولتورل فيكيرلرين يئرلشديرير. اونا گؤره دوننكي و بو گونكو ايستعمارچيلار بير ميلت و قومون ايستيحالهسي اوچون، ديلي اؤز باسقيلارينين اولويتينده قويور و موختليف يوللار ايله اؤزلليكله اوزون آشاغيدا گؤرمه (خود كمتربيني) قوراما (تصنعي و ساختگي) حيسسي ياراتماقلا ضيد بشري آماجلارينين داليسينجاديرلار.
ايران اؤلكهسي تورك، فارس، عرب، كورد، بلوچ، گيلك، لر و . . . كيمي چئشيدلي ميلتلر و قوملاري -كي هر بيرينين موستقيل و اؤزل آناديلي واردير- اولدوغو اوچون ميليونلار اينسانين جسمي، فكري و ذهني چاليشمالارينين عظمتلي و زنگين كولكسيونو كيميدير كي، تارخ بويو بو يئرلرده و هابئله قونشو يئرلرده ياشايبلار اما تأسفلر اولسون كي، آريايي و فارس ديل، كيمليك و تاريخي اساسيندا ايراندا يئني ميلت دوزلتمه ايستيقامتيندهكي غيرفارس ميلت و قوملارين كولتورل آسميلاسيونو اوزره پهلوي حوكومتينين شوونيستي سياستلري، ايران نوفوسونون 70 فايزيني اولوشدوران ميليونلار اينسانين ان ايلكين بشري حاقلاريندان محروم اولمالارينا ندن اولدو. ايران ايسلامي اينقلابي اوغور قازانديقدا، بو سياستلرين شيدتي و بعضي محدوديتلرين آز - چوخ آزالماسينا باخماياراق، هويت، منافع و امنيت اوزره دوزلن ذهنيت ايراندا آرديلاندي (ايدامه تاپدي) و آنا ياسانين 15، 19 و 48- جي اصللرينده نظرده اولان آزاجيق حاقلار دا اودنيلمهدي. ياخين ايللرده كئچميش قوي-گؤتورلردن فايدالاناراق، ميلتلر و قوملارين كيمليكلرينه قاييدما دالغاسي، مدني يوللار اساسيندا ميلي و بينالميللي يئني شرايط و فضا ياراديب كي، شوبههسيز اولكه سوروملولاريني چاليشه چاغيرير. بو يئني مدني رويكرد دانشگاهلي و ضياليلارين عظمتلي پوتانسيلينه داياناراق، شوونيستي شعارلارلا ياتيريلميش نسله، ميلي و قومي اويانيش زنگيني سسلنديرير و يوردون هر مقام، درجه و گئييمده اولان اينصافلي و آييق ويجدانلاريني - قوميت و ميليتلرينه باخماياراق- اوزو ايله يولداش ائدير.
بيز ايكنجي "دونيا آناديلي گونو" قورولتايينا قاتيلانلار، آناديلي مودافعهچيسي اولان يوكسك روتبهلي شهيدلره اؤزلليكله دگرلي بنگال شهيدلرينه احتيرام ائديب، آناديلي اعتيلاسي يولوندا چوخلو چتينليكلرله اوز- اوزه گلن بوتون اينسانلاردان تشكوروموزو بيلديريريك. هابئله يونسكو طرفيندن 21 فوريه دونيا آناديلي گونو سئچيلديگينه تشكور ائديب، تبريزده ايكينجي "دونيا آناديلي گونو" قورولتاين كئچيريلمهسينين قاباغي آلينماسيندان اينزيجار ائديريك و بيرينجي"دونيا آناديلي گونو" قورولتاييندا مطرح اولان ايستكلره تاكيد ائدرك اعلام ائريريك كي:
1- آنا ياسانين 19-جو اصلينده ايراندا ياشايان بوتون اينسانلار، قوم و ميلتلر ديل و سويلارينا باخماياراق برابر سانيلديغي ايچين و هائبله كئچن ايللرده اونلارين ايجراسي اوچون اؤزلليكله كولتورل يؤنده اويغون بير آدديم آتيلماديغي اوچون، اؤلكه سوروملولاري اؤزلليكله مجليس نومايندهلريندن ايران نوفوسونون 70 فاييزيني اولوشدوران غير فارسلارين آناديللرينين اؤيرتيمي و هابئله كولتورلرينين قورونما و گوجلنمهسي يؤنونده اويغون و عملي آدديملار آتماق ايستهييريك.
2- قومي كيمليك و كولتورلردن حيمايت ائتمك، سياسي، ايجتيماعي، ايقتيصادي و فرهنگي قورولوشدا نظره آلينمادان اولا بيلمهديگي ايچين، بيزجه بو مسئله غير موتمركيز موديريت سيستيمي اساسيندا مودرن قانونلاردا گتيريلمهليدير و اؤلكهنين بو اساسدا ايدارهسينه توجه ائديلمهليدير.
3- ايسلامي اينقيلابدان قاباق و سونراكي ايللرده قوملار و ميلتلرين ياشايان بؤلگه، شهر و كندلرين چوخونون آدي غرضلي و يا ناآگاهانه سياستلر اساسيندا دگيشيليبلر كي، اصلي آدلارينا قارتاريلماليديرلار.
4- "ديل حاقلاري اوزره جهاني اعلاميه" جهاني بير منشور عونوانيندا چوخ دگرلي و موتعالي نوكتهلر، مطلبلر و ايستكلري واردير و اوندا گلن بوتون قونولار، اولوسلارآراسي قبول اولونان بير منشور و ميثاقدير. اونا گؤره ايران ايسلام جومهوريتينين دوولتيندن ايستريريك همين اعلاميهيه پايبند اولدوغونو اعلام ائديب و هابئله اونون موفادينين ايجراسي اوچون اوزون موتعهد بيلسين.
5- اؤلكهنين عوايض، ماليات و يئرآلتي ثروتلرينين 70-دن چوخ فاييزي غيرفارس ميلتلر و قوملار اولان بؤلگهلردن تأمين اولدوغو اوچون، بو گليرلري يالنيز فارس ديل و كولتورونون ترويجي و گوجلنديرمه يؤنونده خرج ائتمك، ناعاديلانه و آلپ-آيدين تبعيضدير كي، "ديل حاقلاري اوزره جهاني اعلاميه"نين 10-جو مادهسي و هابئله اخلاقي و ديني اينانجلار اساسيندا قبول اولابيلمهيندير. اونا گؤره دولتي ايمكانلارين اؤلكهده اولان بوتون ديللر و كولتورلرين قورونماسي، گئنيشلنمهسي و هابئله گوجلنمهسي يونونده اويغون و عاديلانه بؤلونمهسين ايستيهييريك.
6- بعضي ايدعالارا باخماياراق، اؤلكهنين غيرفارس ميلت و قوملاريندان اولان آتا-آنالار اوشاقلارينا ميلي و قومي آد سئچمكدن محروم و ياخود چوخلو محدوديت و چتينليكلرله اوزبهاوزدورلر. بيزجه بو مسئله اولوسلارآراسي بوتون كونوانسيونلار، ديني احكام و بشري اخلاقيات و هابئله "ديل حاقلاري اوزره جهاني اعلاميه"نين 3-جو مادهسي ايله موغاييردير و تئزليكله بو مسئلهيه سون قويولماليدير.
7- اؤتن ايللرده ميلتلر و قوملارا منسوب اولان آيدين فيكير، دانيشگاهلي و چوخلو قيشرلر اؤز ميلي، قومي و فرهنگي كيمليكلرينين قورونما و گوجلنمهسي يونونده دگرلي چاليشيقلار آپاريبلار اما تأسوفله چئشيدلي دامغالارلا - اؤزلليكله بؤلوجولوك، پان تركيسم و پان عربيسم- اوزبهاوز اولوب، بير سيرا موجازاتلارا محكوم اولوبلار. اونا گوره بو ايدعالاري بوتونلوكله رد ائتمكله بئله، اولكهده ياشايان بوتون اينسانلارين برابرليگي اساسيندا بيرليك و قارداشليغين قورونماسينا تاكيد ائديب، اؤلكه سوروملولاريندان بئلنچي توققوشمالارا سون قويماق ايستهييريك.
8- جمهور باشقاني سئچكيلرينين 9جو دوورهسي گليب، چاتديقدا بعضي اونملي آديلار و يانداشلاري ميلتلر و قوملارين حاقلاري اودهنيلمهسي و ياخود بو ايستكلرين ضيدينه دانيشيب و موضعلرين بيلديريبلر. بو مسئله اؤزو اؤزلوگونده اؤلكه بالالارينين صداقتلي چاليشمالارينين سونوجا چاتما و هابئله اونلارين ايستكلرينين حقانيتينين گؤستريجيسيدير، ايناجينداييق. اونا گؤره بو فورصتي غنيمت سايماقلا بئله حؤرمتلي آديلار و يانداشلارينا اعلام ائديريك كي، ميلت و قوملارين حاقلي ايستكلري خوصوصوندا عملي برنامه اورتايا قويماميش و علني تعهودنامه ايمضالانماميش، اونلاردان حيمايت اومماق فايداسيزدير و بيز كيمسهيه قوتسال دگرلريميزدن سو ايستيفاده ائتمگه ايجازه وئرمهيهجهييك.
13/12/83
تهران- ايران علم و صنعت بيلييوردو
ايكيجي آناديلي قورولتايينا قاتيلانلار
posted by Mehran Baharlı at 8:19 PM
0 Comments:
Post a Comment
<< Home