Wednesday, December 17, 2008

دکتر عليرضا نظمي خانيم شهناز غلامي باره ده آ.ب.ش سئناتورو هيلاري کلينتون-آ مکتوب گؤندريب



دکتر عليرضا نظمي خانيم شهناز غلامي باره ده آ.ب.ش سئناتورو هيلاري کلينتون-آ مکتوب گؤندريب

۱۵ دسامبر ۲۰۰۸
گونئي آذربايجان ديپلوماتيک کوميسياسي
کاليفورنيا - آ.ب.ش

چوخ سايقيلي سئناتور هيلاري کلينتون
آمئريکا بيرلشيک شتاتلاري، واشينقتون دي.سي

حؤرمتلي سئناتور کلينتون،

من بو مکتوبو سيزه آ.ب.ش سئناتورو اولدوغؤونوز اوچون يازيرام، اونا گؤره دئييلدير کي هوکومتين باش کاتيبي سئچيليبسيز، و يا ان باجاريقلي بيرينجي خانيمسيز. من بو مکتوبو يازيرام چونکو سيز بير خانيمسيز، بير آناسيز، و هاقسيزليقلارين اؤنونده موباريزه آپاريرسيز، و يانليشلارلا ساواشيرسيز. بونلار، سيزي مسئولييت حيسي داشييان بير اينسان ياپماقداديرلار.

سئناتور کلينتون، داها اؤنجه آچيقلاديغيم کيمي، بير ژورناليست، بير قادين، بير آنا، و مسئولييت حيسي داشييان بير ايران مئديا اؤيه سي، شهناز غلامي ۲۰۰۸-اينجي ايل نوامبر آيينين ۹-اوندا توتولوب و او زاماندان بري حبس ائديليبدير.

خانيم غلامي هئچ بير سوچ ايشله مه ييب، حتّی ايسلام جمهوريسي قانونلارينا گؤره ده. بير نئچه آي اؤنجه، بير آذربايجانلي اصيللي (ايراندا ان بؤيوک ائتنيک) اينسان هاقلاري فعاللي غلامرضا اماني آديندا٫ قارداشلارييلا بيرليکده يول قضاسيندا اؤلدورولوبلر. گئنيش شکيلده اينانم واردير کي او يول قضاسي ايسلام جمهوريسي طرفيندن حاضيرلانميشدير؛ يعني ايراندا آذربايجانليلارا قارشي اولونان ظولم و اونلارين سيويل و اينسان هاقلارين دانماغ اوچون ياپيلان، بيتمه يه ن ترور اوپئراسييالاريندان بيريدير. خانيم غلامي، مسئولييتلي بير ژورناليست اولاراق، بو قضا باره سينده آراشديرما ياپماغي اؤنرميشدير. بو، اونون حبس اولونماسينا ندن اولموشدور. او هله ده زينداندادير، وثيقه سيز، موحاکيمه آرزوسوندا، و وکيل توتماغ حاقي اولمادان.

سئناتور کلينتون، تروريسمين ان چيرکين شکلي اودور کي بير رئژيم اؤز وطنداشلارينا قارشي چاليشسين. ايسلام جمهوريسي “بيلينن بير ايرقچي پرسيان/آريان، شيعه ترورچو قوروم” اؤلکه نين فارس (پرسيان) اولمايان ۷۰٪-نه آيري-سئچکيليک تحميل ائتمکده دير. جمهورينين ايرقچي و ترورچو رئژيمي دونياني اؤزلري نين اتم پروقراملارييلا مشقول ائده رک، عئيني زاماندا قبول اولونامايان ميللي تميزله مه جينايتلري و اينسان هاقلاري دانيلمالارين فارس اولمايان ايرانليلارا ائتمکده دير. خانيم غلامي نين حبس اولونماسي بو توتاليتئر و بوغوجو پان-آريان دوکتورينانين گؤسترگه سيدير.

بير آمئريکالي اينسان هاقلاري چاليشقاني اولاراق، گونئي آذربايجان ديپلوماتيک کوميسياسي طرفيندن، و “شهناز غلامي-ني مودافيه کوميته سي”ني هيمايت ائتمک آماجييلا، و هر ندن اوستون، اينسانليق توپلومونون بير اؤيه سي اولاراق، من سيزين ديقتينيزي بو هاقسيزليغا جلب ائديب و سيزين سسينيزي شهناز غلامي-ني مودافيه و اونون اؤزگورلوگو اوچون ايسته ييرم.

تانري سيزي قوروسون، تانري اؤزگورلوگو قوروسون

سايقيلارلا
عليرضا نظمي
گونئي آذربايجان ديپلوماتيک کوميسياسي
(باي بک اوچون اينگيليسجه دن چئوريليبدير)

0 Comments:

Post a Comment

<< Home