موجاهيدين-ي خالق سازمانيندان آيريلان آزربايجانليلارين موراجيعتي

موجاهيدين-ي خالق سازمانيندان آيريلان آزربايجانليلارين آزربايجان ميللتينه موراجيعتي

قهرمان آزربايجان ميللتينه موراجيعت

بيز خالق موجاهيدلريˊنين (مجاهدين خلق) اسكي عوضولري اولاراق بوگوندن ائعتيبارن آدي گئچه ن تشكيلاتدان آيريليب، هر جور امكداشليغي قيريب، اٶز ايمكانلاريميزي و گوجوموزو اٶز خالقيميزين آزادليغي و موستقيللييي يولوندا صرف ائتمك ايسته ديييميزي ائعلان ائديريك. البتته بو آيريلمانين سببلريني چوخ تفرروعاتلي شكيلده بيزيم طرفيميزدن وئريله ن بوروشوردا آنلاتميشيق. آمما او بوروشورو الده ائتمه يه نلر اوچون اونون مضمونونو خولاصه شكلينده وئرمه يي مقصده اويقون سايديق:

١- خالق موجاهيدلري پهلويˊنين ديكتاتور-شووئنيست رئژيمي دٶورونده او زامانين شرطلرينه اوياراق، ايكي آزربايجانلي ائولادي طرفيندن قورولموش ايدي. اونلار اٶز گٶروشلرينه گٶره گئچميشده ايران دئييله ن يئرين تاريخيني گٶزدن گئچيره ره ك بو نتيجه يه گليب چيخميشلاردير كي:

الف- بوگونه قده ر اولان تشكيلاتلارين حيرفه يي اولمامالاري
ب- اونلارين ايدئولوژيك موجاديله وئرمه مه لري

مٶوجود رئژيمين موطلق گوجونو قورويوب ساخلاماسينا سبب اولموشدور. بونا گٶره ده اونلار دورومو ده ييشمك، رئژيمي ييخماق اوچون تشكيلاتلي شكيلده موجاديله ائتمه يه باشلاديلار. شاهˊين آپاريلماسي و خومئينيˊنين گتيريلمه سي عرفه سينده، خالقين حيمايه سين قازانميش بير گوجه چئوريلديلر. و باشقا سيياسي قوروهلارلا حقيقي بير اينقيلاب دوشونجه سي ايله حركت ائتديلر و چوخلو اٶلولر وئرديلر. آمما اٶز يولونا اينانميش، او صاديق اينسانلارين سٶزده يوللارين گئده ن شخصلر، اونلارين يولوندان و خالقدان آيريلاراق ديكتاتور فيرقه يه تبديل اولدولار.

٢- مسعود رجوي و اونون همكارلاري موللالارلا برابر (اورتاقلاشا) مينلرجه اينسانين بوش يئره قانلارينين تٶكولمه سينه سبب اولوب، ايران دئييله ن يئرين خالقلارينين ايچينده اٶز داياقلاريني ايتيرديلر.

٣- خالق آراسيندا داياق تاپماقديقلاريندان عراق رئژيمينه و خاريجي قوووه لره آرخالاناراق ايكي اٶلكه آراسيندا اولان ساواشدا وطنه-ميللته خيانت ائده ره ك، دوشمنين ٥-نجي قولونا چئوريلديلر.

٤- سانتراليزم دئموكراسي ايدديعاسيندا اولان تشكيلاتي، موريد-مورادليق شيوه سينده ياخود خومئيني شكيلنده ايداره ائتمه يه قالخديلار. هر جور اخلاقسيزليغا مئيدان ياراتديلار.

٥- دونياميزدا مودئرن دوشونجه اولاراق لاييكليك يئريني، ديني سيياسته آلت ائده ره ك، خومئيني اٶز رئژيميني ايسلام جومهورييتي آدلانديرديغي كيمي، موجاهيدلر ده دئموكراتيك ايسلام جومهوريسي آدلانديرديلار.

٦- بو تشكيلاتدا شاه و خوئميني رئژيملري كيمي ايران دئييله ن يئرين رئالليقلاريني گٶرمه زليكدن گله ره ك، بير ديل، بير ميللت شوعاريني وئره ره ك پان ايرانيستلرين و فارس شووئنيستلرين يولونو سئچديلر.

٧- اونلار هامان ايدئولوژيدن چيخيش ائده ره ك، ايران دئييله ن يئرده كي ميللتلرين هر بير آزادليق ايسته يينه بٶلوجولوك گٶزو ايله باخاراق قارشي چيخديلار. خوصوصي ايله عوضولرينين چوخو آزربايجانلي اولدوغو حالدا، آزربايجان ميللتينه دوشمنچيليك حيسلريني گيزله تمه ديلر.

حٶرمتلي وطنداشلاريميز:

بوتون بو قئيد ائديله نلرين ياني سيرا، دونياميزدا اولان ده ييشيكليكلر و ميللتيميزين اٶز آزادليق و موستقيللييي اوغروندا آپارديغي موباريزه بيزلري ده بونا اينانديرميشدير كي، اٶزگه لر اوچون موجاديله وئريب اٶلمكدنسه، اٶز ميللتيميزين يانيندا يئر آليب، اونون ايسته كلريني اٶز ايسته كلريميز قبول ائديب، بو ايدئاللارين حقيقته قوووشماسي اوچون موجاديله وئره ك؛ اٶلسه ك ده، ميللتيميزين آزادليغي يولوندا اٶله ك. البتته بٶيوك و مئهريبان ميللتيميز بيزيم گئچميشده بيله ره ك و يا بيلمه يه ره ك، ائتديييميز خطالاري باغيشلاياجاغينا اينانيريق.

عئين زاماندا، بو وسيله ايله بوگون و گئچميشده موجاهيدلره قاتيلميش آزربايجانلي سويداشلاريميزا سسله نه ره ك، اونلاردان دا ايسته ييريك كي ميللتيميزين آزادليق و قورتولوش موجاديله سينه قاتيلسينلار. بو شكيلده وطنه – ميللته اولان بورجلاريني يئرينه يئتيرسينلر؛ اٶز ميللتيميزين يانيندا اوزو قارا اولماقدانسا دا، آلني آچيق ياشاسينلار.

ياشاسين آزربايجان ميللتينين آزادليق و قورتولوش ساواشي
موجاهيدين-ي خالق سازمانيندان آيريلان آزربايجانليلار